A vuci dâ poisia

Rici chi ora iu m’avissi a nzignari
a scriviri e parrari ‘u miricanu,
picchì nun sugnu un littiratu veru
s’iddu in tuscanu iu sequitu a pinsari
e a sunnàrimi sonni in sicilianu.
Si ‘u voi sapiri, iu nsaju di liggìri
pueti ngrisi, francisi e ostreci
nta lingua so, cu a traruzzioni ‘n facci
chi accumogghiu e scumogghiu cu la manu.
Sì, leggiu corchi libru chi m’accattu
ncapu Amazòn, e dopu, stinnicchiatu
ntô divanu, mi vaiu prumuniannu
palori cchiù luntani di luntanu.
E vaiu tambasiannu munni munni
cu nteppriti saputi e fausi amichi,
e ogni tantu, nzirragghiànnu l’occhi,
mpinci e nzerta lu cori unni ‘u sapiri
trova lavanchi nivuri e sciddìchi:
a paggina s’adduma e di trasattu
capisciu lu poeta socchi rici,
picchì dda vuci canta e mummurìa
cû ‘a stissa vuci ruci di me matri.