Ciuri sittimbrini

‘U cielu, macari iddu, è fermo e nfuscu.
Cchiù janchizzu ca griciu, comu ‘un fussi
cummigghiatu, ma solu sculuruto.
L’arbuli darrè ‘i vitri, ancora virdi,
ccu quacchi fogghia menzu arrugginuta,
‘un si movinu, parinu pittati
nta curnici – Sapiti chi vi dicu?
Nun sapennu chi fannu sti jurnati,
si chiovi o ‘un chiovi, si torna o nun torna
‘a vostra e mia patruna, iu ppi dispettu
v’abbivìru, ciuriddi dilicati,
ciuri ammusciuti, ciuri sittimbrini
rassignati a muriri.

Radichi e fogghi

Troppu tardu capiu, o matri mia,
chi lu to latti, ‘i to’ palori sunnu
pidamentu da me filusufia.
Nni l’anni dâ me foddi carusanza
iu mi smammai di li toi nsignamenti
e pinsai di pinsàrila secunnu
autri cumannamenti, autri custumi;
ca ‘i toi mi parsiru sulu gnuranza,
minchiunarìi di viddani babbiuni.

Uora sacciu ca chiddu chi nui semu
nun è soccu pinsamu sulamenti.
‘U nostru senziu cogghi ncapu ncapu
‘i sintimenti, e nun li sa capiri.
E’ comu un margiu l’anima di l’omu:
supra ci sunu troffi, arbuli, ciuri
e lippu comu niuli scurusi;
sutta c’è lu tirrenu limarrusu
chi nùtrica, a lu scuru, soccu appari.

Soccu si vidi, e puru nui videmu
di nui stissi, è ‘na fogghia cimalora:
semu virdi du’ jorna e poi caremu.
Ma li vini dû cori hannu surgenti
intra l’antichi zucchi sittirrati;
e macari iu, frunnusu di palori,
sarmentu menzu sdillucatu, sugnu
jèttitu di ‘na radica profunna
chi mi duna lu sangu e mi susteni.

Nomi ncapu ô marmuru

Me matri dici chi voli scrivìri
‘u nomu miu e chiddi di me’ soru
ncapu a lu “munumentu”, voli diri
‘a tomba di famigghia. Accussì ô tempu
chi voli Diu, a centuquinnci anni,
basta juncìrici ‘a data di morti,
e ‘a nascita si po’ scrivìri già.
‘U largu c’è, mi dici, e lu cuperchiu
fu fattu ccu abbunnanza e maistria;
nsumma avissi piaciri, di ddassusu,
di sapiri ca tutti li me’ figghi
spirduti e sparpagghiati munni munni
s’arricuggheru e ristaru ccu mia.

È ‘na bona pinsata, dicu iu,
e capisciu ca chista to manòpira
‘un è malaguriusa comu pari.
È pr’amuri ca tu li figghi toi
Ii voi vicini e nun arrisicari
ca su’ luntani ppi l’etirnità.
Ma chi bisognu c’è di prinutari
‘u locu miu e scrivìri, si già sacciu
chi dda rintra mi vogghiu arrizzittari?
Sparti c’è già lu nomu ncapu û marmuru:
nomu e cugnomu, ‘i stissi di me nannu.
E si nasciu e morsi nnô sissanta
o l’atrannu o dumani, toccu ferru,
cu si nni futti dopu ‘n paru d’anni?

Megghiu ‘a cinniri

A l’umbra ‘i nucipersi e nta cabina
cunurtata di chiantu, forsi ca
si dormi cchiù cuntenti? Quannu ‘u suli
ppi mia nun fa cchiù lustru, chi mi mporta
si mi chiancinu, siddu hannu duluri,
supra ‘a fotugrafia nto smartphòne
o mpiccicatu ncapu a ‘na balata?
Sti pinseri pinsavu l’atra vota,
parrannu cu me soru e ragiunannu
si unu, mortu, si senti cchiù biatu
sutta un metru di terra sittirratu
oppuru ncinnirutu.Tutti dui
conchiudimmu chi è sulu ‘na quistioni
di sordi e di fastidiu dî parenti;
picchì ‘a carrozza dû cassamurtaru,
di ccà in Sicilia, sennu ca è luntanu,
costa migghiari d’euru. Megghiu ‘a cinniri:
dintra ‘na cascitedda, a fai vulari
cu l’ariuplanu. Quannu passi poi
menzu ‘i calìpsi, ô boscu dâ Biddìa,
ti fai ‘a cruci e mi sparpagghi ô ventu.
Cussì, dô finistrinu, senza scìnniri
dâ machina. Si poi mi voi nziccari
ncostu a li nostri nanni e a nostru patri,
nun servi piccu e pala e muraturi:
scavi cu ‘a manu, a tagghiu ô balatuni,
e ddà mi chianti, comu fussi un ciuri.

Secunnu jornu d’autunnu

Puru ‘i culleghi oggi s’addunaru
ch’avia durmutu picca, cu sta facci
jarnizza e murtacina. E, dilicati,
a sparti mi spiaru si ppi casu
ci trasiva ‘na fimmina. Ma nonzi,
nun nzirtaru, ca sugnu vaccinatu,
e ‘un m’avissi chiamari cchiù Giuanni
si ppi du’ occhi di jatta e dui minni
‘n’atra vota m’avissi a dijttari.

Ma no, ci arrispunniu, ca ‘un m’arricordu
lu ciauru, lu nomu e lu culuri
di l’occhi e di li pila. Si nun dormu
jè chi nun vogghiu mai chi veni ‘a sira
e patisciu lu canciu di stagiuni.

Masochismo

Ma chi è sta prescia d’arrivari ‘n casa,
‘i sira, dopo un jornu di travagghiu,
pp’addumàrimi la tilivisioni?
C’è sempri ‘n autru tempu dâ partita
senza fini tra ‘i dui squatri nimici:
chidda dî malacunnutta scuncirtusi
e chidda scumminata dî me’ amici.
Si viri ca mi piaci, o ‘un mi dispiaci,
guastarimi lu sangu e lu pitittu,
ngustiarimi la vita. ‘Un fussi megghiu
scurzari anticchia uno dî munzeddi
di libbri ncapu ‘i seggi e ‘u buffitinu?
Tantu chi pozzu fari? Cu st’Italia
‘un ci po’ cchiù mancu ‘a pinnicillina.
Di ddu briganti cu a facci di cira
‘un s’a scapula, troppu ci assimigghia.

Fudda di vuci

Ci sunu tanti vuci quannu scrivu
ca iu nun sacciu a cu’ haiu a scutari.
Parrati unu a la vota, ppi favuri,
prima li morti e dopu chiddi vivi.

Prima ‘i mettiri niuru supra jancu
ci passu a prifirenza a patri e matri.
‘Un pozzu dari ntisa a tutti l’atri
si nun capisciu a cu’ sta supra e a ciancu.

Largu dunca a li me’ parenti stritti,
poi a li canuscenti, a li parrati
furasteri, ê cumarchi scanusciuti
e, si mi resta tempu, a li pueti.

Canciamenti

Com’era nsiccumatu st’arbuliddu,
ddu piduzzu d’oliva chi l’atrannu
canciau casa ccu mia, puru iddu
scippatu e richiantatu! Passau ‘n annu

e, un parmu ch’era, uora è un metru almenu.
L’arriviscìru ‘na grasta cchiù ranni,
st’aria ‘i punenti e lu novu tirrenu.
Ora campa li so’ quattrucent’anni

e cuntinua a sparari faidduni,
si l’abbivira cocchi arma pia:
cchiù assai, sicuru, di li me’ stagiuni.

Iu puru haiu cchiù aria e largasia
nni chista casa, a chistu balcuni.
Ma nun c’è aria chi mi godi a mia.

‘A navi scunzata

Dopo vintiquattr’uri di spittaculu,
susìru ‘a navi. Mischina, chi pena,
tutta schifiata ô sciancu chi pusava
ncapu a lu so matarazzu di schogghi!
E pacenza si trentadui puvreddi
anniati a mari nun arrivisceru.
Ma uora basta, ppi pietà, ‘u sapemu
ca simu bravi a mettiri a l’addritta
‘i morti ppi sunarici ‘a fanfarra.
Uora, dici ‘a TV, fussi ‘u mumentu
c’abbadassimu a l’autru bastimentu.

Ah la navi di lussu, guvirnata
dî pirripicchi e latri e ncumpitenti:
taliati comi l’hannu arriduciuta!
Coccunu dici chi galleggia, ‘n autru
ch’affunna, chi affunnau, chi ballarìa;
tracodda, si ripigghia, trasi e nesci
di lu barrancu; poi l’arripizzamu
e arreri la scunzamu e l’affunnamu.
Passanu l’anni e ‘un cangia la canzuna.
E puru sta metafura dâ navi,
pirdunati, mi rumpi li cugghiuna.